पारोळा (जळगाव): पारोळा तालुक्यातील करंजी बु. येथील एका ८५ वर्षीय एकट्या राहणाऱ्या वृद्ध महिलेचे अपहरण करून हत्या केल्याच्या धक्कादायक गुन्ह्याचा स्थानिक गुन्हे शाखेने (LCB) सलग ४० दिवसांच्या अथक तपासानंतर यशस्वी छडा लावला आहे. या प्रकरणात वृद्धेच्या सख्ख्या भाच्यालाच अटक करण्यात आली आहे.
नेमकी काय आहे घटना?
करंजी बु. येथील रहिवासी गंगुबाई उर्फ वैजंताबाई गणपत माळी (वय ८५) या ३ ऑगस्ट २०२६ रोजी सकाळी ८ वाजेच्या सुमारास राहत्या घरातून अचानक बेपत्ता झाल्या होत्या. त्यांच्या अंगावर मोठ्या प्रमाणावर सोन्या-चांदीचे दागिने असल्याने चोरीच्या उद्देशाने त्यांचे अपहरण किंवा घातपात झाल्याचा संशय व्यक्त होत होता. याप्रकरणी पारोळा पोलीस ठाण्यात मिसिंगची नोंद करण्यात आली होती.
LCB कडून ४० दिवसांचा थरारक शोध
गुन्ह्याचे गांभीर्य लक्षात घेऊन पोलीस अधीक्षकांनी स्थानिक गुन्हे शाखेला (LCB) समांतर तपासाचे आदेश दिले. LCB चे वरिष्ठ पोलीस निरीक्षक राहुल गायकवाड यांच्या मार्गदर्शनाखाली दोन स्वतंत्र पथके स्थापन करण्यात आली:
* पहिले पथक: संशयिताचा शोध घेण्यासाठी पारोळा, दळवेल, मुकटी, फागणे, धुळे आणि चाळीसगाव भागात कार्यरत होते.
* दुसरे पथक: अपहृत महिलेचा शोध घेण्यासाठी पारोळा ते जळगाव असा सुमारे २५० किमीचा प्रवास करत तांत्रिक विश्लेषण करत होते.
१५० CCTV कॅमेऱ्यांच्या फुटेजने उघड केला कट
तपासादरम्यान पोलिसांनी परिसरातील तब्बल १५० हून अधिक CCTV कॅमेऱ्यांचे फुटेज तपासले. ३ ऑगस्ट रोजी सकाळी ७:१६ वाजेच्या सुमारास वैजंताबाई यांचा सख्खा भाचा (बहिणीचा मुलगा) प्रशांत उत्तम माळी (वय ४०, रा. मुकटी, जि. धुळे) हा त्यांच्या अंगणात बोलताना दिसला. त्यानंतर काही वेळातच वैजंताबाई पांढऱ्या रंगाच्या मारुती स्विफ्ट डिझायर कारमधून पारोळाच्या दिशेने जाताना आढळल्या.
भाच्याची कबुली
CCTV फुटेज आणि तांत्रिक पुराव्यांच्या आधारे संशय बळावल्याने पोलिसांनी प्रशांत माळी याला ताब्यात घेऊन चौकशी केली. सुरुवातीला उडवाउडवीची उत्तरे देणाऱ्या प्रशांतने अखेर पोलिसांच्या खाक्यासमोर गुन्ह्याची कबुली दिली.
पोलीस अधीक्षक आणि LCB च्या पथकाने केलेल्या या कौतुकास्पद कारवाईमुळे ४० दिवसांनंतर या गंभीर गुन्ह्याचा उलगडा झाला आहे.
