पोलिसांनी अचानक धाड टाकली असता, त्या ठिकाणी ३१ लॅपटॉप आणि कॉल सेंटरची आधुनिक यंत्रणा आढळून आली. पोलिसांनी केलेल्या प्राथमिक तपासणीत सदरचे कॉल सेंटर खास करून विदेशी लोकांची फसवणूक करण्यासाठी सुरू केल्याचे स्पष्ट झाले. कॉल सेंटरमधील कर्मचारी स्वतःला अधिकृत एजंट असल्याचे सांगून डेटा चेक करण्याच्या बहाण्याने किंवा इतर आकर्षक आमिषे दाखवून परदेशी नागरिकांना गंडवित होते. दोन लॅपटॉपवर पैशांचे व्यवहारही झाल्याचे पोलिसांना आढळून आले. पोलिसांनी अट केलेले संशयित हे कोलकाता येथील रहिवाशी आहेत.

दरम्यान, जळगाव पोलिसांनी चौकशीसाठी फार्म हाऊसचे मालक माजी महापौर ललित कोल्हे यांना सुद्धा ताब्यात घेतले आहे. शिंदे गटाचे नेते तथा जिल्ह्याचे पालकमंत्री गुलाबराव पाटील यांचे निकटवर्तीय मानले जाणाऱ्या कोल्हे यांच्यावर झालेल्या पोलीस कारवाईनंतर जळगावचे राजकीय वातावरण चांगलेच ढवळून निघाले आहे. आजोबा, वडील, काका यांचा राजकीय वारसा चालवित असताना कोल्हे यांनी मनसेच्या माध्यमातून सक्रीय राजकारणाची सुरूवात केली होती.

विधानसभेचा जळगाव ग्रामीण मतदारसंघ अस्तित्वात आल्यानंतरची २००९ ची पहिली निवडणूक देखील त्यांनी लढली होती. मात्र, पहिल्या प्रयत्नात अपयश आल्यानंतर त्यांनी २०१४ मध्ये जळगाव शहरातून मनसेची उमेदवारी केली. त्यावेळी त्यांच्या प्रचारासाठी राज ठाकरे यांनी जळगावात सभाही झाली होती. परंतु, कोल्हे यांचे आमदारकीचे स्वप्न काही पूर्ण झाले नाही.

पोलिसांनी आज ललित कोल्हे यांच्या ममूराबाद रस्त्यावरील एल. के. फॉर्म हाऊसवर छापा टाकला. यावेळी या ठिकाणी बनावट कॉल सेंटर होतं याचा खुलासा झाला. हे कॉल सेंटर पोलिसांनी उद्ध्वस्त केलं. या कॉल सेंटरच्या माध्यमातून देशी-विदेशी नागरिकांचे लाखो रुपये लुटल्याचा पोलिसांना संशय आहे. विशेष म्हणजे फॉर्म हाऊसमधून तब्बल 32 लॅपटॉप आणि 7 मोबाईल्स जप्त करण्यात आले आहेत. पोलिसांची ही सर्वात मोठी कारवाई मानली जात आहे.

सध्या शिवसेनेत (एकनाथ शिंदे) सक्रीय असलेले कोल्हे हे जळगाव महापालिकेची आगामी निवडणूक लढण्याच्या तयारीत होते. तत्पूर्वीच, त्यांच्या फार्म हाऊसवर ऑनलाईन फसवणुकीच्या उद्देशाने चालविल्या जाणाऱ्या बोगस कॉल सेंटरचा पर्दाफाश झाला. काही वर्षांपूर्वीही कोल्हे यांच्या त्या वादग्रस्त फार्म हाऊसवर जुगार अड्डा चालविला जात असल्याचे उघडकीस आल्याने मोठी पोलीस कारवाई झाली होती.

दरम्यान, ललित कोल्हे हे आधी मनसे पक्षाशी संबंधित होते. ते 2018 मध्ये भाजपसोबत संलग्न झाले. त्यांची सप्टेंबर 2017 मध्ये जळगावचे महापौर म्हणून निवड झाली होती. तसेच त्याआधी ते मनसे आणि माजी मंत्री सुरेश जैन यांच्या खान्देश विकास आघाडीच्या पाठिंब्याने जळगाव महापालिकेचे उपमहापौर बनले होते. याशिवाय त्यांनी 2009 आणि 2014 मध्ये मनसेच्या तिकीटावर आमदारकी लढवली होती. पण त्यांना अपयश आलं होतं. ते जळगावच्या राजकारणातील बडे प्रस्थ म्हणून मानले जातात. त्यामुळे त्यांच्याबाबत संबंधित प्रकार समोर आल्याने अनेकांच्या भूवया उंचावल्या आहे.

आमदारकीचा नाद सोडून ललित कोल्हे यांनी नंतरच्या काळात जळगाव महापालिकेवर लक्ष केंद्रीत केले. त्यांच्या नेतृत्वाखाली मनसेचे तब्बल १२ नगरसेवक महापालिका निवडणुकीत विजयी झाले. तरीही कोल्हे २०१७ मध्ये खान्देश विकास आघाडीच्या पाठिंब्याने जळगावचे महापौर बनले. मनसेची शिडी वापरून महापौर पदापर्यंत मजल मारल्यावर २०१८ मध्ये मात्र कोल्हे यांनी काही नगरसेवकांना बरोबर घेऊन भाजपमध्ये प्रवेश केला. अर्थात, भाजपमध्येही ते जास्त दिवस थांबले नाहीत.